السفر من العراق الى لبنان - برنامج سياحي متكامل

 سفرتي الى لبنان بالتفصيل الممل مع الاسعار للشخص الواحد

🍀 البرنامج كله من ترتيبي الخاص 🍀

🔴 طيران وفندق

اول شي بالنسبه الي حجزت طيران من مكتب و الفندق عن طريق booking بالوقت الي يخدمني.

*تكدر تستخدم اكثر من تطبيق حتى تحصل حجوزات طيران وفنادق (( باسعار مناسبه)) اكو تطبيقات من خلالها تكدر تحجز فندق وطيران بنفس التطبيق وتصير عليك ارخص وبي دسكاونت

*تكدر تروح وترجع مع شركة عراقية طيران وفندق هم ((ارخصلك )) بس تلتزم بوقتهم طبيعي جدا يضيع عليك يوم او يومين بسبب توقيتات الطيران

🔴 التجول في لبنان 

١- سيارتك الخاصة تجيبها و تجي 😂 

٢- تاجير سياره من مكاتب تاجير سيارات وانت تسوق ( اذا تدعمها غرامة ٧٠٠$ ) .. اسعار حلوه اكو حصلت بيكانتو ٢٠٢٠ بسعر ٤٠$ بالعيد ..واكو عدهم سيارات توصل للرانج خلال فتره العيد ٣٠٠$ اليوم الواحد .. (الاسعار بالايام العادية ارخص من فترة العيد والزخم لان شغل ماكو) 

٣- تاجر تكسي (( لا تاجر من الشارع .. من الشارع لا تاجر )) .. اكو ارقام تكسيات تحصلهم منا و منا بالكروبات والشباب الي رايحين ( واخذ اكثر من رقم واتصل عليهم واتساب وعاملهم بالسعر لتسوي نفسك محصور بالتالي يصعدون عليك السعر مثل ما صار وياي 😑😑😑)  اجرة التكسي يوم كامل ٣٠$ اكثر او اقل .. ( الي اجرته كال ٥٠-٦٠ $ .. شافني مسلكها وممهتم ،نهاية اليوم يكولي افترينا هواي انطيني ٧٠ واخر شي صفت ٦٠$ باليوم 😑😑😑 ) تقفيص علني بالنهاية يحملك منية انو بالشارع ياخذون ١٠٠$ ميكولك انت غشيم يقارن بالاعلى في اكو بنفس الفتره شباب راحو فتره عيد و دافعين ٤٠$ و ٣٠$ لليوم الواحد 😑 (اتفق ويا على كلشي وقت طلعة مبكر و رجوع متاخر انت دافع فلوس )

٤- الطريقة الاخيرة انو تروح وية كروبات صغيره  هناك (( من لبنان ))  يطلعون كروبات .. تراسلون فيس وعدهم رحلات يومية ونشاطات حلوة باسعار مناسبه

بعد ما حجزت طيران وامورك تمام تبدي ترتب البرنامج باللي تشوفه مناسب في حال طالع بسيارتك او بتكسي (مناسب يعني مترهم تروح للشمال و الجنوب بنفس اليوم لازم على نفس الطريق )

🍀هذا البرنامج الي مشيت عليه مع اسعار الدخوليات للشخص الواحد بالليرة🍀

🔴 🔴

-مغاره كفر حيم ١٥٠ الف

-قلعة موسى ١٠٠ الف

-قصر بيت الدين ١٠ الف

-مغارة عين وزين ١٥٠ الف

-غابات ارز الباروك ١٠٠ الف

🔴 🔴

-جبيل .. منطقة عالبحر حارة وشمس ورطوبة ..( شي طبيعي عالبحر )

-جونيا باراشوت او الباراكيلدنك ٨٠$

-تلفريك الى السيدة حريصة ١٠٠ الف

-مغاره جعيتا ١٣٣ الف ( احلى شي تفوتكم )

*بنفس اليوم تكدر تروح الى متحف الحيوانات صاير عالطريق واكو هم متحف شمع جان عالطريق بوحدة من الايام 

🔴 🔴

-سفاري TVS دراجة حديثة وكبيرة مع الرماية ٩٠$ تكدر تعاملة وتحصلها باقل و اذا مو حديثة ممكن ب٥٠$

-شلالات افقا (منطقة حلوة وحتى التكسي ما يندلها مشيت عالخارطة)

-رجوع من طريق جبيل الى بالوع بلعا بطريقنه

-بالوع بلعا منظر رهيب لازم تروحوله

*بنفس اليوم تكدر تلحك تروح الى (( فاريا )) بنفس اليوم يحتاجلها تطلع من وقت حتى كلها تكفي بيوم واحد 

🔴 🔴

-مدينة مائية rio lento - ٣٠$ كلشي جوة بفلوس حتى المفتاح مال لوكر 😂

-برمانا منطقة جبلية اعتيادية كلشي مستفاديت منها 😐 ولا حتى تسوه صوره (اخذنه لمطعم منير بالمنطقه وخنكة لازم حجز من وقت حتى تحصل مكان زين والا اهرب افضل )

-صعدنا الى جبل صنين ( شي لطيف وعالي جدا و بنهايته اكو نبع بارد )

🔴 🔴

-صيدا وقلعة صيدا ورحلة بحرية للجزيرة 

-شلالات زرقاء 

-منتجع جنة سورمير janna sur mer

-شلال جزين

🔴 🔴

-اثار بعلبك رونز

-رافتنك نهر العاصي

🔴 🔴

-منتجع روكا مارينا rocca marina (للعلم عدهم بكيني كود لحد ساعة ٤ مساءاً)

-طرابلس tripoli 

-البترون batroun

🔴 فعاليات اخرى ممكن تسويها خلال وحدة من الايام المذكوره فوك ..  🔴

- نادي الفروسية وركوب الخيل وهناك اكو اعلى مرجوحة 😐 (مرحتلها) وايضا سمعت اكو نشاطات هواي ركوب خيل في جبار ارز الباروك (بس ابو التكسي بقة فوك راسي و بسرعة بسرعة طلعت 😑)

- الغوص بالبحر ينزلون وياك غواصين ويعلموك لازم تروح تسال وترتب امورك مكانهم صاير قريب المنارة ببيروت واكو خارج بيروت احلى كالو ( ما جربته صراحة بس مجرب الغوص في جزيرة بالي جان رهيب 🥺 )

- كارتنك carting ( مثل كراش 😂 ) اكو مكان بي كارتنك كبير يسوه افضل من البقية اذا عاجبكم تروحوله  .

- تجربة الباراشوت في جونية النزول من مكان عالي جدا احلى من اي باراشوت عالبحر ويختلف تماماً وتجربة ما تتفوت .

- رحلات بحرية يم صخرة الروشة وباماكن اخرى من لبنان شي لطيف بس الاسعار لازم تحصل سعر مناسب همة يلزكون بيك يبدي وياك من ٣٠$ يشوفك لابس الوضعية يوصل ١٠$ وانت مغلس عادي يعوفك ويروح 😂

🔴 للعلم ان الاسعار المذكورة بالليرة اللبنانية و بالدولار وتصريف الورقة بوقتها  ٢.٩٠٠.٠٠٠

طبعا جنت اطلع مع تكسي من ساعة ١٠ صباحا الى ساعة ٦ مساءا اني بالفندق 😐 ماعرف الاخ متعاجز او هو هيج سستم عدهم .. فجنت اطلع بعدها اتمشى الى صخرة الروشة بيها أجواء مشي حلوة على البحر وقت الغروب

 او الى الجميزة شارع سيارات 

*او الزيتونة 

ملاحظات ممكن تفيدك تطبيقات تنزلها ومطاعم لازم تجربها 🤤

** اذا جنت محتاج تكسي لمنطقة معينه مثلا بالليل عاجبك تروح لمكان اكو تطبيق اوبر و اكو الوتكسي اني جربت اوبر من الحمرا للمطار ٢.٦٦$ يعني ٤٠٠٠ دينار تقريبا في حين التكسي العادي يطلب ٢٠$ او ١٥$ بالقليل .. تاكد انو الدفع تم مو بعدين تطلع وما مسجلها انت دافع كاش بالتطبيق

**اسعار الوجبات بصوره عامة بالمطاعم جيدة ممكن ١٥$ الى ١٠$ ممكن اكثر حسب شكد تاكل 😐 اكو هناك وكالات مطاعم عالمية واسعارهم ارخص من عدنه kfc وغيره .. بشارع الحمرا قريب البحر اكو bella napoli pizza اطيب بيتزا ممكن تاكلها يومية من ارجع اروحلهم و اكو بنفس الشارع اكلات يابانية japan meet china نودلز دجاج اطيب شي عدهم وتطلب وياها شرائح لحم نهاية العالم ثنينهم يمكن صارو ١٠$ بالصور موجودات 🥺💔

**اغلب محلات الي بشارع الحمراء ((قفااااصة )). خلال فتره عيد او باي فتره بس يعرفك مو لبناني السلعة الرديئة يكولك سعرها ١٥٠$ و هية فعليا تاخذها من باب الشرجي نفسها ١٠ دينار عراقي 😂😂😂 حاول متشتري منهم ، غشيم واحد باليوم يكفيهم 😁😁😁 

محلات اذا ضروري هالشي بالحمرا (الي ما بيها تقفيص وتكون مسعرة للكل) : الدورادر - السي - ومحلات قريب ستاربكس

*اكو مدينة مائية فوق جبل احلى بهواي بس ابو تكسي ميندل

** اكو مول ABC verdan بي ماركات وبي سينما 4D بشده 🤤🤤

الصور الي ممنزلها تكدرون تبحثون عنها بالكوكل

#لبنان #بيروت