طريقة العناية بشجرة الكاردينيا الخارجية

العناية بزهرة الكاردينيا 

🌳  ركز وياي حتى تحب هاي نبته☘️

🌿اسمي كاردينا 🌿

أحجيلكم عن نفسي أنا من عائلة الياسمين تعرفون بيت ياسمين بيتهم بشارع اليرموك 😁الي هي شجرة الياسمين اصلنا من الصين . بس قسمتنا العوجه خلتنا علج بحلوك الناس وفرجه لأمة محمد وفضيحتنا صارت على كل لسان نبته 😁بين قوسين اصبحنا مهزله وسمعتنا طين 😁لي كده لي يمتعلمين يبتوع المدارس تعملوا كده فينا 😁 أفضل نبات هو أني انتج اوكسجين نقي وازهاري تدخل في تصنيع العطور بس هاي قسمتنه بعد .خل احجيلكم شنو نحتاج بلكت الله يهديكم وطبقون الي نريده 🫢

🌨️الرطوبه الخاصه بينه

 

البعض يشتريني من مشاتل بوجه ابو العريف خلاني بالبيت لو على ميز مكتب وخلص مهم يقضي وقته يسلى بأزهاري ومن اذبل وتيبس اوارقي ها ماتت المرحومه فلك طرك غير تعرف شنو احتاج جبتوني من مشتل تركضون وفرحانين اسألوا عني عن عائلتي عن اخلاقي الي صارت  زفت بيتكم  وصرت مكفخه للرايح والجاي 😁

اغلب أجواء المنازل هي مظلمه  أو بي نور شمس مباشر لكن جاف يعني تجي الشمس مثل صاروخ تسمط سمط .مباشرة راح تتحول الاوراق إلى جفاف عاطفي 😁 واصفرار مصحوب بسواد على الورق والبراعم جنابذ الورد راح تذبل وتسود هسه راح تسأل ليش؟ انت وفرت ضوء بس مباشر فقط هذا راح يتلف شبابي واوراقي وبنفس وقت جاف . طيب شنو مطلوب ؟ تخلوني تحت اضائة شمس قويه بس غير مباشره يعني ضوء مفلتر يعني مابي شعاء شمس لاهب لان بشرتي كلش حساسه 😔 وبنفس الوقت ترطيب الجو والتربه . اعرف بيكم داتقرون والي بيكم مخلي ماعون ماء تحت سندانتي والي يسقيني بتربه انت سبب تعاستي سبب شيب راسي وسواد ليلي 😁 لأن الرطوبه هي وضع اناء في ماء بجانبي ويكون بمستوى سندانتي حتى استمد منه الرطوبه وليس تحتي مثل مامعلميكم علماء ناسا  لأن جذوري ااذ هيك راح تتلف ويصيبني فطريات حاده ودكتوره حميده معزله بشارع الكندي 😁 لاتخلي تربتي تجف نهائيا لأن مباشرة اموت وعدل كبل للفتحه سادسه مايرهملي كلشي .شكول عليك الي جبتني العراق ودمرت سمعتي وسمعت اهلي 😁

💧الري اي السقي

 

اني ماحب اسبح يوميه هيك من الله طبيعتي مو معناها وسخه لا اسألو عليه صالون ديلر 😁 من شوف تربتي شبه رطبه لاتسقيني ماعاتبه عليكم لأن السقي الزائد راح يتلف جذوري مباشرة راح يصيبني تيبس السيقان وموت يصير بيه شلل رباعي بسببكم كم واحد يقرأ هسه وهو سبب اعاقتي😁لذلك اجعل تربتي خليط من بتموس وبرلايت ويكون سقي مالتي حصريا ماء مفلتر خال من الأملاح لأن الأملاح تقتلني مباشرة واتمدد على القبله واعالج 😔 وسندانتي تكون سهلة تصريف بيها فتحتات كثيره .عدوي السندان السيراميك لأن ماكدر نام بيها يصير عندي فقرات وتكسر اضلعي 😁 لأن مابيها ثقوب 🙏يعني مخلص كلام تعطوني ماء بالصيف مرتين بالاسبوع ومره وحده بالشتاء هيك الله خلقني .

🌱تسود  اوراقي وتساقطها

عندي تساقط كثير بالشعر والسبب مدجيبون اليه شامبو أطفال 😁تشترولي ابو الالف دينار من شورجه😁 السبب هو عدم ثبوتي مكان يوميه ناقليني مكان يوم بالحمام يوم بالصاله يوم بغرفة النوم يوم بالحديقه الخارجيه وهكذا اتنقل عبالك مرحومه ديشعون بيها بكل مكان 😁 خلوني بمكان ثابت لأن راح اتكيف على درجة حراره ثابته اذا غيرت مكاني خلص تسود أوراقي وتتيبس وتتعركف وتسقط وشتعل اهلي بسببكم 🫢

☘️التسميد

اني ماريد منكم تشوهون سمعتي كدام الناس انو مطلعين عليه شبهات اني اشرب npk كل سبوع ومتعادل ومن هذا الخرط لو واحد يجيب حديد يزق بيه شنو دالعب رياضه 😁لو واحد يجيب خل تفاح شنو عزيزي شكلولك  أسكر وداسوي جاجيك مثلا 😁السماد الي احتاجه هو عضوي مافي مواد كيميائية فقط عضوي طحالب بحريه أو ماء الرز المنقوع افضل شيء إليه مو دمرتوني. اني اقوى نبات اتحمل كل الضروف بس مشكلتي اجيت يمكم بهذلتو حالي وصرت مضحكه لليسوى والمايسوى بسبب تصريحاتكم التسميديه 😁