6 خرافات عن الاطعمة التي تقلل الوزن

منشور طويل لو اي احد وزنه اكثر من 100 خلي يشوف كلامي

اول شي اني مو كابتن بس اني شخص سمين وزنه جان 119 بس ضعف هسه 95 ومستمر بالضعف لحد المثالي

اكثر اشاعات ضرتني اكثر ما فادتني

1- الفواكهه السكر مالتها ميأثر بشي ولا يصعد السكر ولا تسمن يمكن هاي اكثر أشاعة جذب شفتها بحياتي  شفت واحد يكول حبي اكل شكد متريد فواكهة هاي كلها صحية وما تسمن ولا تقصر بالتمر  والعنب والموز

2- الشوفان يضعف! يا اخي شكد اضحك من اشوف هالجملة الشوفان مميزاته فقط انو يخليك تشبع لمدة طويلة وبنفس الوكت لان عود صحي وبي فيتامينات لكن هل هو يضعف او يستحق تجبر حالك تاكله علمود عود نتائج؟ الجواب لا بالعكس ماكو فرق بينه وبين الطحين بس الفرق صحي وهاهية!

3- المكسرات صحية ودهونها تساعد الشخص يضعف ؟!!؟ يمكن هالحجي اكثر شي يخلي الناس تثبت بالوزن وبحياتها ما تصعد لمكان والمشكلة من تناقشه تلكاه اصلاً مو بنفس هدفك ولا حالتك لان هو وزنه 50 وحلمه يصعد 70 لان يدور ضخامة!!

4- زبدة الفول السوداني تفيد الي مسوين ريجيم؟ وهي خاشوكة صغيرة منها 200 سعرة حرارية يعني لو تاكل 3 تفاحات خضره ما رح تطلع بكد هالخاشوكة ولو تاكل بطاطتين كبار مسلوكات هم مرح تطلع بكد اذيتها  كلها دهون وتفيد فقط للتضخيم ولان عود تشبع وصحية

5- زيت الزيتون مفيد استبدله بالزيت العادي يا اخي وكي زيت الزيتون صحي تمام بس هو زيت حاله حال اي زيت ثاني بي سعرات عالية وبي دهون يعني شخص هدفه يضعف ليش تنصحون يحطه بكل أكلة؟! مثل شفت واحد يكول حطه بالزلاطة وبالاكل وتشوف عملية الايض تصير افضل واسرع وحرق الدهون اسرع!!!

6- أكل شكد ما تريد اكل صحي بس لتاكل اكل صناعي!!! وهو جسم الانسان فيزيائي يمشي على عجز السعرات شاف ماكو سعرات ماكو كافية للجسم يبلش يحرك بالدهون وهاهية لو يجي واحد ياكل 2500 سعرة حرارية وهو احتياجه 2000 بشرط يكون خضار وفواكهة واكل صحي وتجيب واحد ثاني ياكل 1800 سعرة حلويات ونساتل وجبوسه حتشوف بعد شهرين ابو النساتل نزل كيلوين دهون والي اكل خضار صعد وزنه كيلوين واكثر الجسم ماله دخل شتاكل صحي او لا بس اكيد الصحي احسن لان بي فيتامينات بس مو لان يضعف!! وشفت ناس تكول اكل افوكادو يضعف و اكل تمر يضعف يا اخي كافي تنشرون اشاعات جذب والمشكلة اله اجرب بنفسي يلا اكتشف هالشي ردت فد مره احد ينصح ماكو

وهاي نصيحة مستحيل تضعف بدون ما تتعب ماكو شي سهل بهالحياة لو ما جهدت حالك ولعبة رياضة وحسيت بالحرمان (ما اقصد الجوع اقصد انو تنحرم من السكريات والنساتل والدهون والكارب العالي) مستحيل تضعف وعجز السعرات هو اهم شي  

اول شهر لعبة رياضة 45 دقيقة حرق 600 سعرة واكل "صحي" براحتي شفت حالي سمنت كيلو!!! واني عود حارم حالي من كلشي وداتعذب

ثاني شهر قللت الاكل وخليت الكارديو ساعة ونص وعفت "الدهون الصحية"  وقللت سعراتي شفت حالي نازل 5 كيلو بشهر

ثالث شهر كمت العب كارديو ساعتين بحيث من اكمل تمريني جسمي مدمر بس اريد ارجع للبيت  شفت وكمت اكل صحي عفت التمن بشكل نهائي والبرغل واستبدلتهم ببطاطا سلك وراها تحميص بالاير فراير (تطلع عبالك مكليه) ويا شوربة عدس وزلاطة وببسي زيرو كالوري  الصدمة شفت حالي ضعفان 13 كيلو بشهر!! وفهمت نفسي انو الاكل مو نشوة وانما مجرد احتياج الجسم 

119 كيلو من بلشت وهسه حالياً 94-95 ومتأكد منا للشهر الوره أبريل رح اكون 85 كلشي ديمشي ويايه عدل لان جربت واكتشفت بنفسي شلون اضعف