شرح موقع LinkedIn و الفائدة من عمل حساب عليه
من تريد تسوي اي شي تسأل
مثلا تريد تأجر بيت، تروح تسأل بالمنطقة شلونهم اهل البيت؟ الجيران شونهم؟ الخدمات ؟ و غيرها
من تريد تاخذ سيارة رح تفحص السيارة و تسأل باللي يفهمون بيها
زين من تريد تقدم وظيفة؟ من تصعد مقابلة و تروح لمكان العمل؟ معقولة رح تقبل راسا بكلشي يكولوا بدون متسأل؟
زين اذا ردت اسأل، وين اروح؟ المن اسأل؟ شنو اسوي؟
شكد حلو لو واحد يشتغل نفس الشغل حتلو بغير مكان يحجيلنا و يدربنا شنو نقرة و شنو نسوي قبل المقابلة...
هنا يجي دور منصة اللينكدان LinkedIn
بشنو رح يفيدني بروفايل اللينكدان؟
يفيدك اللينكدان بهواية سوالف رح نحاول بهذا البوست نغطي بعض الجوانب:
1. لينكدان هو منصة تواصل اجتماعي للمهنيين و المحترفين بالاعمال و بالمنظمات و الشركات الخاصة، مثل الفيسبوك بالضبط، بي كروبات و بي بيجات للشركات و اماكن العمل و بي اضافة معارف اللي تشبه اضافة صديق بالفيس، لكن مستخدمين المنصة هاي تركيزهم على التطوير، التعلم، العمل، التوظيف و امور مشابهة
2. باللنكد ان تكدر تبحث عن عمل بسكشن ال Jobs قبل جان محد يستخدمه بالعراق، بس بعد دخول الشركات و المنظمات دنشوف المنصة دتصعد بالعراق و كثير شركات صارت تعلن وظائفها هناك خاصة بعد 2018
3. تكدر باللنكدان تلتحق بكروبات، و اكو كروبات لكلشي، مثلا كروبات مبرمجين و مصممين، كروبات اداريين المشاريع، كروبات التسويق و المبيعات، كروبات ادارة السوشيال ميديا، كروبات العمل الانساني و كثير من الكروبات غيرها، اذا تطب بهاي الكروبات رح تلكه هواية ناس اصحاب خبرة و تجربة ممكن تتعلم منهم اخر الترند مال الادوات المستخدمة او التدريبات المتاحة
4. تكدرباللينكد ان ان تسوي سيفي خاص بيك من البروفايل الشخصي و تستخدم خاصية Resume maker و هنا رح توفر على نفسك ان تكعد تعيد التصميم و تدور تامبلت جاهز و يجوز ميكون احترافي، هنا اللينكدان رح يهتم بهاي السوالف كلها و انت تهتم بالمحتوى اللي رح تكتبه لكل ويفة تقدم عليها، و الاحلى انه يخزن كل سيفي سويته بحيث اذا احتاجيت سيفي مال مصمم مثلا و تريد تقدم على ويفة مصمم بغير مكان رح تسوي تعديلات بسيطة و تقدم
5. وحدة من الشغلات المهمة اللي يقدمها لينكدان هي منصة لينكدان ليرنينك Linkedin Learning و هي منصة مدفوعة بقدر 30$ بالشهر تقريبا و ينطيك وصول لكافة انواع الكورسات الاونلاين اللي تحصل منهن شهادات تنعرض ببروفايلك ورة متخلص كل تدريب، المنصة ايضا توفرلك خدمة شهر تجريبي مجاني على حسابهم قبل ما تدفع
تعليقات
إرسال تعليق