ما هي الوضائف الملائمة للمتخرجين حديثا ؟

 ماهي الوظائف الملائمة للمتخرجين حديثاً

السلام عليكم

خلي نعرف شنو هي الأربع وظائف الي لازم انت تستهدفهن وتحاول تقدم عليهن ( طبعاً يجوز اكو اكثر من 4 وظائف بس هذني الي اني متيقن منهن ).

1- موظف الكول سنتر

2- مندوب المبيعات

3- قسم الدعم في شركات الانترنت (technical support)

4- مدخل البيانات

هسه خلي نجي نشرح كل نقطة

1- موظف الكول سنتر : هذه الوظيفة للي ميعرف هي تخص الرد على مكالمات واستفسارات المشتركين للأجابة على اسئلتهم وحل مشاكلهم إن وجدت.

وهذه الوظيفة تحتاج شخص فريش بعده بحيله مثل مانكول لأن هي متعبة لذلك الشركات ما تبحث عن الخبرة بقدر بحثها عن الشخص الشاب والي يتحمل هيج شغل بإعتبار ما مشتغلة سابقاً وصاير عنده ملل.

وطبعا حتى تنقبل بهذه الوظيفة تحتاج انه تقوّي لغتك الإنكليزية ومهارتك بالأوفيس ( اكسل, وورد,اوت لوك) بالإضافة الي هدوئك وكلامك بشكل لبق.

2- مندوب المبيعات : من الوظائف الي احبها وتخلي عندك ثقة بالنفس وتقوي لغة التواصل بينك وبين الناس وبالإضافة الى تكوّن علاقات مع مختلف المستويات.

هذه الوظيفة تحتاج الى شخص حسن المظهر ( مو معناها حلو أو لا , حسن المظهر معناها ملابسة مرتبة وقريبة الى الرسمي وكذلك نظيف !! )

كذلك تحتاج انه عندك معلومات أساسية عن المبيعات وشنو صفات المندوب الناجح ومهارات البيع (تلكاهن كلهن بالعم Google) وايضاً لازم تكون لبق وعندك سرعة بديهية، وأيضا مهارات بالحاسوب والاوفيس.

#ملاحظة: قسم المبيعات بي أنواع الموظفين وخبراتهم مختلفة : احنه نحجي عالمندوب العادي بشكل عام مو سوبر فايزر مثلاً .

3- موظف الدعم الفني في شركات الانترنت : هذه الوظيفة بشكل عام تخص خريجين الحاسبات ( هندسة,علوم) طبعاً مو بالسهولة تحصلها لأن انت ماعندك خبرة

بس تكدر تتعب شوية وتروح تاخذ شهادة سيسكو CCNA , وكذلك مايكروتك MTCNA وضل تابع شركات الانترنت وخطيتك بركَبتي اذا ماحصلت وظيفة بعد فترة.

4- مدخل البيانات : هذه الوظيفة عادةً تكثر بالشركات الي عندها ادخال/تدقيق بيانات بكثرة سواءً للعقود او بيانات أخرى حسب طبيعة الشركة

وما تحتاج خبرة بقدر ما تحتاج مهارة في استخدام الحاسوب وحزمة الاوفيس عموماً وسرعة في الكتابة على الكيبورد.

ملاحظة 1 : هذا مايعني الي يشتغلون بهذه المجالات همه ماعدهم خبرة او تقليل من عملهم, بالعكس ولكن هذه الوظائف بيها مستويات مثلا قسم الدعم الخاص بشبكات الانترنت اكو الاقدم تصير مسؤولياته اكثر حساسية من الموظف الجديد, وكذلك الكول سنتر بيهم التيم ليدر والسينور ... الخ

ملاحظة 2: الوظائف الي ذكرتهن أعلاه اني مشتغلهن (بإستثناء قسم الدعم لشركات الانترنت بس عندي أصدقاء بيها متخرجين حديثاً) واتكلمت عن خبرتي الي مريت بيها.

ملاحظة 3 : ذكرت هذه الوظائف لأن تتوفر بأغلب الشركات لذلك تسهل عليك عملية البحث عنها وكذلك ما تركز على شهادتك الجامعية حتى لو كنت خريج أي اختصاص .