كيف تجد وضيفة في العراق

 كلها واسطات ؟ لو غير شي؟ 

بالاونة الاخيرة زادت اعلانات الوظائف و دنشوف حركة غير مسبوقة بالقطاع الخاص بالعراق خاصة بعد سنة 2018

و كثير من المعارف من نسألهم ليش متقدمون؟ الجواب بالغالب "كلها واسطات!"

شنو الواسطات؟ و هل بناء المعارف و الشبكات المهنية شي سيء؟

بالحقيقة العالم كلش تطور و مو مثل قبل، بالعراق نوع العمل الغالب هو القطاع الحكومي و اللي التعيين بي مركزي او حسب شهادتك، و بهذا النوع من التوظيف يصير عن طريق تحديد ميزانية من وزارة التخطيط و يتنفذ عن طريق وزارة العمل و الوزارة اللي تريد توظف، ما ينطلب سيفي بهذا النوع من الوظيفة باغلب الاحيان لان شهادتك هي السيفي مالتك

اما النوع الثاني من العمل هو القطاع الخاص، و بالاونة الاخيرة تطور هذا القطاع من دخلت المنظمات و الشركات الدولية بي، ينقسم القطاع الخاص الى عدة فروع مثل الشركات العائلية الخاصة، او الشركات التجارية، الشركات و المنظمات الدولية او المحلات التجارية

بهذا النوع من العمل، نسمع دائما عن العلاقات و دورها و للاسف نكول واسطات، لكن هذا المفهوم مو صحيح خاصة للشركات الربحية، ليش؟ ركز وياية

الواسطة هي ان يتم توظيف شخص بسبب علاقته الشخصية بشخص ثاني او منفعة محددة حتى يتم غض البصر عن بعض المهارات او كلهن و النتيجة يكون شخص غير كفوء لازم منصب بالشركة

هذا الشي ميمشي بالشركات الدولية و المنظمات الدولية بالسهولة اللي تتخيلها، ليش؟ لان هاي الشركات اذا استمرت وية هيج كوالتي من الاشخاص فرح تتكبد خسائر جسيمة، لان الشركات لازم تطلع ارباح و المنظمات عدها مشاريع تنفذها بميزانية و وقت محدد، اذا ما وافقت الشروط للمانحين او المستثمرين فببساطة المؤسسة تنهار، وهذا الشي يكون من اصغر منصب الى اكبر منصب

و هذا الشي يلفت انتباهنا الى مفهوم العلاقات و الشبكة المهنية و شلون استفاد منها ؟

اولشي خلي نعرف شنو الشبكات المهنية؟ اللي مشتغلين بالعلاقات العامة رح يتفقون وية هالكلام، ببساطة الشبكة المهنية هي الاشخاص المهنيين بمناصب محددة تكون علاقة مهنية وياهم حتى تنعرف بالوسط المهني و بالتالي يكون الك براند و تكون ملاحظ من قبل الركروترز او الاج ار بالمؤسسات الاخرى

يعني بالعراقي نكدر نكول من تبني الشبكة المهنية مالتك انت دتبني سمعتك، و السمعة تسبق الشخص لاي مكان يطبله

شنو الفائدة من الشبكات المهنية؟

1. رح يكون عندك معرفة بالترند المهني، شنو الوظائف الي عليها طلب بسوق العمل، و هالشي يساعدك تحدد اهدافك التطويرية للمستقبل

2. رح تكون مطلع على اخبار الشركات و المنظمات و يكون عندك دراية بالمناصب اللي تفتح يمهم

3. رح تفهم انظمة عدة منظمات و شركات و شلون تشتغل، هالشي رح يفيدك من تقدم على اي مؤسسة انت فاهم اهدافهم و اساليب عملهم، شنو اللي يحبوا و شنو اللي ميحبوا

4. رح تتعرف على كل بيئات العمل قبل ما تطب بيها و تكدر تقرر انه تروح للمقابلة او لا

5. رح تكدر تقيم كل شغلة شكد راتبها التقديري حسب معلوماتك اللي جمعتها من شبكتك المهنية وهالشي رح يفيدك بالتفاوض عالراتب

5. رح تعرف الترند بالمؤسسات و شنو اساليب العمل المختلفة، اذا كنت موظف بمكان تكدر تنقل تجربة بعض المنظمات الى مؤسستك و تكون مصدر نجاح الك بمكان عملك

شنو رايكم انتو؟ نحب نسمع وجهة نظركم؟😍