خطوات و متطلبات دراسة الطب في امريكا
الطب بأمريكا شنو هي خطواته و متطلباته؟
1. اولشي حبيبي تخلص سادس و تجيب كل المتطلبات للتقديم على البكلوريوس (طبعا بامريكا ماكو تفرقه بين التخصصات) فكل جامعه الها متطلباتها و بالعاده تكون نفس الشي لكل التخصصات (مع بعض الحالات الشاذة النادره) ورا متحضر كلشي تقدم.
2. طبعا متقدم على كلية طب، تقدم على درجة بكلوريوس و يسموها Pre-med و تكدر تدرس بيها اي تخصص قريب من ال Biology مثل ال Neuroscience و تخلص درجه بكلوريوس ام ال 4 سنوات طبيعي.
3. انت صح تسوي درجه بكلوريوس مال Pre-med بس يعني اكو عده تخصصات ترهم، ف اكو مجموعة دروس لازم تكون متأكد انو دارسهم قبل متدخل كلية الطب.
4. طبعا ورا متخلص البكلوريوس مالتك او اثناء متدرس لازم تقدم اختبار اسمه ال MCAT (المهم قبل متفوت طب) و هذا الاختبار اختصار ل Medical College Admission Test.
5. وراها تقدم لكلية الطب و اذا نقبلت راح تدرس 4 سنوات.
6. طبعا بامريكا ميعترفون بيك انو درست طب يعني صرت دكتور، لا حبيبي تعال سوي اختبار اسمه USMLE علمود تكون طبيب مرخص، و هذا الاختبار بي 3 امتحانات (STEPS) لازم تسوي الاول و الثاني، ممكن اثناء الكلية و ممكن وراها و لازم تنجح و تجيب الدرجه المطلوبه.
7. ورا متكون خلصت بكلوريوس + 4 سنين طب + خطوتين USMLE هنا راح تكون مؤهل انو تقدم عل Residency و مشهورة بأمريكا تحت مسمى ال Match for residency او هيج شيء، و الفكره منه انو ورا متخلص الكلية مال طب تبلش تشتغل و تختار فد تخصص معين تداوم بي.
8. ورا متخلص الاقامه، الي ممكن تطول 3 سنوات او اكثر، حسب الوضع و التخصص و هيج، تسوي اخر step من ال USMLE.
9. تسوي شهادة ال Board الي هي نكدر نكول انو شي يكول انو انت صرت مختص بال anesthesiology مثلا و طبعا اكيد عدد السنين و الاختبارات مالتها و كلشي يتغيير من تخصص لتخصص، وراها اكيد تكدر تتفرع اكثر و تحصل شهايد اكثر بتخصصك و تسوي subspecialty و غيرها من الأمور الي تكون موجودة بكل الدول تقريبا و تشوف شنو اكو امور قانونيه تسويها بولايتك و تبلش بال career مالتك.
الطب بامريكا نظامة مختلف عن باقي العالم لان يطلب منك درجة بكلوريوس قبل لا ان تقدمله، و اكيد ما ننسى انو معدل سنين الطب "لكل مرحله" هي اكثر تقريبا من هواي دول.
ملاحظة: هاي مجرد ارقام و امثله تقريبية و شرح مبسط للعملية بدون تفاصيل دقيقة و الهدف منه مجرد توضيح رحلة دراسة الطب بامريكا. تكدرون تحصلون ارقام مضبوطه اكثر و معلومات ادق ب Google
اسأله؟ استفسارات؟
 |
| دراسة الطب في امريكا |
تعليقات
إرسال تعليق