كل ما تريد معرفته عن الدراسة في روسيا للطلاب العراقيين

الدراسة في روسيا 🇷🇺

روسيا اكبر بلد بالعالم وبي جانبين، جانب قريب ع قارة آسيا يعني قريب على الدول الآسيوية والمدن بهذا الجانب تكون المعيشة والدراسة بيها ارخص، وجانب قريب على الدول الاوربية وهذا الجانب هو غالي جداً من ناحية تكاليف الدراسة والمعيشة.

لماذا الدراسة في روسيا

ببساطة لأن بيها مميزات مناسبة لجميع فئات الطلاب وبلد حلو ومتنوع الثقافات، فضلاً عن اهم ميزة وهي تكلفة الدراسة والمعيشة المنخفضة يعني ارخص بهواي مقارنة بجامعات العراق الأهلية وجامعات الدول الأخرى مثل مصر، وهذا السبب الي خلاها الخيار المناسب للطلاب العرب والعراقيين.

معدل الدراسة في روسيا

الجامعات الروسية بدون معدل، لكن وزارة التعليم العالي العراقية تشترط لازم يكون معدلك اقل شي:

الاحيائي: 80%

التطبيقي: 85% 

حتى ينفتحلك ملف ويتم الاعتراف بشهادتك في العراق حالك حال كل طلاب الطب.

اما اذا انت عندك امكانية وقررت تدرس ضمن وحدة من افضل 500 جامعة بالعالم ( تصنيف شانغهاي للجامعات حصراً ) فهنا لا الجامعة الروسية ولا وزارة التعليم العراقية تشترط عليك معدل، يعني حتى لو معدلك 50% وتدرس بوحدة من هذني الجامعات راح يعترفون بشهادتك.

تكلفة الدراسة في روسيا بالدولار

جامعات روسيا المعترف بيها بالعراق والي تحتوي تخصصات طبية كثيرة والاسعار تختلف من جامعة لجامعة وحسب المدينة الي بيها الجامعة، لان اكو مدن مثل العاصمة موسكو هاي تكون غالية، لكن بصورة عامة هذه اقل الاسعار التقريبية لتخصصات الطب وطب الأسنان :

يتراوح بين 3000$ ( 3,600,000 ~ دينار) بالمدن المتوسطة.

الى 10,000 دولار ( 12,000,000~ دينار ) وهذا اكيد يكون بالمدن الغالية مثل العاصمة موسكو ومدينة سانت بطرسبورغ، ليش ذني المدن تحديداً ؟ لأن يصيرن ضمن الجانب الأوربي يعني القريب من الدول الاوربية.

هل الدراسة في روسيا باللغة الانكليزية ام الروسية 

حسب رغبتك طبعاً تكون الدراسة، بس حسب الجامعة الي تريد تقدم بيها هل متوفر بيها الدراسة باللغات الانكليزية او لا، لكن الدراسة باللغة الروسية اكيد تكون ارخص من الدراسة بالانكليزي، واذا قررت تدرس باللغة الروسية لازم تدرس سنة تحضيرية قبل لاتبلش دراستك بالجامعة، السنة التحضيرية تتعلم بيها اللغة الروسية والمواد الي راح تحتاجها بدراستك مثل الكيمياء والأحياء وغيرهم.. تدرسهم باللغة الروسية هم.

تكلفة السكن في روسيا بالدولار 

• تكلفة السكن الداخلي ( سكن الجامعة ) تكون رخيصة على أقل تقدير 150$ بالسنة لكن في الغالب يكون مو نظيف ولازم تتأكد من هذا الشي قبل أن تقدم. 

• اما تكلفة الشقة السكنية ( مستقلة ) تكون غالية يعني شقة نظيفة على أقل تقدير 150$ بالشهر، تكدر تتشارك بيها انت وكم طالب وهيج يقل السعر عليك.

🍔 شكد يكلف الأكل ؟ 🍔

• اذا تطبخ بنفسك راح يكلفك أقل طبعاً وعلى أقل تقدير 100$ بالشهر وممكن تقلله حسب اكلك.

• اما اذا تخلصها اكل من المطاعم فيكون اغلى ويكلفك على أقل تقدير 300$ بالشهر.

💵 شنو المصاريف الباقية بعد ؟ 💵

طبعاً اكو بعد مصاريف وتنقسم 3 اقسام:

اولاً: اشياء ضرورية شهرياً

• الاتصالات: 5$ بالشهر تاخذ بيها 1000 دقيقة مكالمات و 200 رسالة.

• الانترنت: 5$ بالشهر غير محدود وقوي جداً بروسيا، وممكن اذا جامعتك زينة يتوفر مجاناً داخل القسم.

• المواصلات: 10$ اشتراك شهري مواصلات عامة واذا تكسي اغلى يكون تقريباً 1$ لكل كيلومتر.

ثانياً: مصاريف ثابتة سنوياً

• تجديد فيزا: 100$ بالسنة.

• تأمين صحي: 100$ بالسنة.

ثالثاً: مصاريفك الشخصية

مثل ملابس وغيرها، وهاي تعتمد عليك شخصياً. 

(❗️) ملاحظة مهمة : تكاليف السكن والأكل والملابس والجامعة تختلف بين المدن منها الغالية مثل موسكو وسانت بطرسبورغ ومنها الرخصية، في هذا الشرح اخذت اسعار المدن المتوسطة لا رخيصة ولا غالية.

راح نرفق الكم ملف بالأسفل بي الجامعات الروسية المعترف بيها من قبل وزارة التعليم العالي والبحث العلمي العراقية آخر تحديث لهاي السنة✨ 

شارك المنشور وي اصدقائك حتى تعم الفائدة💙