طريقة دراسة بكلوريوس الطب في ألمانيا
دراسة بكلوريوس الطب في ألمانيا 🇩🇪💉
الجزء الاول
ملاحظة: اني ما قدمت طب لالمانيا و لا ادرس هناك و لكن في فترة من الفترات اهتميت شويه بالموضوع فجمعت هاي المعلومات، تكدرون تاخذوها كرؤس نقاط و تبلشون تبحثون اكثر بالانترنت، مجرد اكتبو دراسة الطب في ألمانيا، و يفضل يكون بحثكم بالانكليزي و توسعو شوي شوي بالبحث، غير هيج اتمنى تستفادون من المعلومات الجايه 🇩🇪♥️
⭕️ اول سؤال ممكن يجي ابال اي شخص يريد يدرس طب، هو ليش اختار المانيا حته ادرس بيها من دون غير دول؟
مميزات دراسة الطب في المانيا
1. الدراسه بيها مجانية/شبه مجانيه (ممكن تدفعون شي 500€ بالفصل)2. السكن و المعيشه بالمانيا ارخص من دول اوربية ثانيه بنفس القوه (مثل فرنسا و ايطاليا) بس يعني مو عبالكم المانيا رخيصه
3. ألمانيا دولة تسمحلك تبقه بيها ورا متتخرج و تشتغل هناك، فضلا عن انو فرص العمل متوفره هناك
4. كموووننن! ألمانيا! يعني دولة اتحاد، يعني وحده من ارقى دول العالم 😂
⭕️ خوش خوش مدام ابلاش ف الموضوع مغري، زين شنو نظام دراسة الطب هناك؟
عادي جدااا، تدرس 6 سنوات كالشطور و بعدين تسوي اختبار استحصال رخصة مزاولة الطب في ألمانيا و مبرووكك يا دكتووور
متطلبات دراسة الطب في المانيا
⭕️ ريهام، احتاج سنه تحضرية اذا اني تخرجت سادس من العراق و ارد ادرس طب بألمانيا لو لا؟1. اي، تحتاج تدرس سنه نحضرية اذا انت خريج العراق بشرط يكون عدك لغة المانية بمستوى B2 و شهادة تخرج سادس
2. تكدر تترك السنة التحضرية اذا انت درست بكلية الطب بالعراق سنتين، فمن تروح هناك لالمانيا تبلش كلية طب من دون سنه تحضرية
3. اعرف كلش هواي اكو اسأله ببالكم عن السنه التحضرية و وين ندرسها و شون نقدملها و شكد تكلف و شنو شروطها و متطلباتها، بس ماكو مساحة نكتب عنها هنا، ممكن تبحثون بكوكل عن السنة التحضرية في ألمانيا
⭕️ المهم، هسه اني خلصت سادس بالعراق و ستوفيت جميع شروط السنه التحضرية و رحت قدمت و نقبلت و درستها و خلصت، هسه ارد ادرس طب، شنو هي شروط و متطلبات الطب؟
1. اثبات لغة المانية عن طريق اختبار ال DSH-3 او ال TestDaf
2. شهادة السادس مترجمة للالماني و مصدقه و لازم معدل فوك ال 94 و تكون مخلص السنة التحضرية و مجتازها
3. اختبار ال TestAS و هذا هو اختبار قدرات لدخول الجامعات الألمانية، ابحثو عنه بالانترنيت اكثر
4. اكيد تحتاجون ال application مال الجامعه / رسالة الدافع / السيرة الذاتيه / رسائل توصيه / جواز / شهايدك التقديريه و الخ من الامور الي تكون موجودة بكل منحه
 |
| دراسة الطب في المانيا |
هسه اني جمعتهم كلهم و خلصت كلشي شون اقدم؟
انصحكم تشوفون قناة studyshoot على اليوتيوب بيها هيج شروحات
⭕️ تكلفة دراسة الطب في المانيا
طبعا مثل مذكرت انو الدراسه شبه مجانيه و تقريبا مراح تدفعون اكثر من 500€ بالفصل الواحد فهاي مو مشكله و متحتاجون منحة علمودها و لكن ممكن تحتاجون 10k€ للمعيشة سنويا و هذا مبلغ شويه عالي، فممكن تحلو عن انو تشتغلون قبل متسافرون بالعراق او تشتغلون اونلاين او في المانيا او ممكن ايضا عن طريق بعض المنح الي تنطي راتب شهري للطالب في ألمانيا و الي انصحكم تبحثون عنها بالانترنت اكثر اذا تحتاجون دعم مادي + تحتاج تثبت أنو عدك فلوس كافية لدعم نفسك في ألمانيا (8700€) و إحدى الطرق التي تكدر من خلالها إثبات أن لديك أموالاً كافية هي عن طريق إيداع دفعة تأمين في حساب بنكي.
⭕️ دراسة الطب في ألمانيا بأي لغة
بالألمانية بس اكو برامج جداااا قليلة بالانكليزي، ممكن تشوفون بالنت عن دراسة الطب في ألمانيا باللغة الإنجليزية.
اعرف اكو هواي اسأله بعد ببالكم، بس صدوكني النت مليااااان مجرد ابحثو شويه عن الموضوع، ممكن بعد اكو اسأله ابالكم عن الموضوع اكدر اجاوبها ف اتركوها بالتعليقات و همات اذا عدكم معلومات مفيدة ياريت تحطوها بالكومنتات و بسسسس :) ♥️
الكاتب / ريهام العاني @rehamalani
تعليقات
إرسال تعليق