كل ما تريد معرفته عن التعليم الموازي في الجامعات العراقية - الحدود الدنيا + اقساط

 شنوة التعليم الموازي بالعراق؟ الموازي معناه انه تنقبل بجامعة حكومية حالك حال بقية الطلبة بس بمعدل اقل بشوية وبمقابل هذا الامتياز، تدفع فلوس (حرفيا رشوة قانونية) للحكومة من خلال دراستك الصباحية بجامعة حكومية علمود تشتري شكم درجة على المعدل، وهذا باختصار، والكم التفاصيل الكاملة لجوة:

الحدود الدنيا للقبول الموازي

بالنسبة لمعدلات القبول بالموازي فتعتمد على حسب الحدود الدنيا الي تعلنها وزارة التعليم العالي، وعلى اساس الضوابط هذه والي ممكن تتغير من سنة لثانية: (كل الدرجات هي عن الحد الادنى)

• - 3 درجات بكليات الطب على مستوى كل الجامعات العراقية.
• - 3 درجات بكليات طب الأسنان، الصيدلة، التمريض، التقنيات الصحية والطبية، المعاهد التقنية الطبية على مستوى المحافظة الوحدة للتخصص المناظر.
• - 4 درجات بكليات المجموعة الهندسية والمعاهد التقنية الهندسية.
• - 5 درجات بكليات العلوم.
• - 6 درجات بباقي التخصصات ومن ضمنها الطب البيطري.

*فمثلا الصيدلة هالسنة لو قبلت معدل 97.1 كحدود دنيا وانت معدلك 96 او 95 او 94، بمعنى اقل من المعدل المطلوب لحد 3 درجات، رح تنقبل بالموازي.

 

الموازي تكون نسبة القبول مالته زيادة فوك خطة القبول المركزي. واذا طلع اسمك بقناة الموازي بالقبول وجنت تريد ترجع للقبول الاصلي من المركزي او غيره، فتكدر تسوي هيج بس قبل اكمال عملية التسجيل (يعني ما تروح تسجل، مجرد يطلع اسمك بالقبولات الالكترونية). علما انه كل قبولاتك الثانية تنلغي (المركزي، الاهلي، المسائي، المباشر، الخ...) بحالة انه انقبلت وسجلت ودفعت الاجور وما تكدر بعد ترجع عن هذا الشيء نهائيا.

اسعار الموازي في الجامعات العراقية

حاليا اسعار الموازي صايرة اقل خصوصا بعد تخفيضات 2021-2022 للكليات والمعاهد، والي ممكن تتغير من سنة لثانية، وكالاتي: (الاسعار كلها بالدينار العراقي)

• - الطب 4,500,000 
• - طب الاسنان 3,750,000 
• - الصيدلة 3,250,000 
• - النفط والمعماري بالهندسة 1,500,000
• - الاقسام الهندسية الثانية 1,125,000
• - التقنيات الهندسية 1,000,000
• - التمريض 875,000
• - التقنيات الطبية والصحية 1,125,000
• - العلوم والعلوم السياحية والتخصصات العلمية 750,000
• - القانون 600,000
• - الانسانيات 450,000
• - التقنيات الادارية 500,000
• - المعاهد التقنية الطبية 1,000,000
• - المعاهد التكنولوجية 600,000
• - بقية المعاهد التقنية 375,000

 

*علما انه تسديد اجور الموازي بعد التخفيض رح يكون على شكل اقساط من 3 دفعات.