الفرق بين المهارات الناعمة (soft skills) والمهارات الصلبة (interpersonal skills)
{تخطيط و تطوير}
مرحباً جميعاً .... من وجهة نظري شخصياً و اني مطبقهن حرفياً، قبل ما افكر بأي وظيفة او منصب لازم اني عندي مؤهلاته ومخطط بشكل صح. ف اكو مهارات اساسية و اكو مهارات مكتسبة نكدر نحصل عليها اثناء عملنه وبكل وقت طبعاً ولكن المهارات الي لازم تكون عدنه حتى نكون "شخص قوي و يكدر ينافس" هيه نوعين خل نكول بشكل رئيسي:
موضوع اليوم هو الفرق بين Soft Skills و interpersonal skills و شكد مهمات و ممكن الاغلبية ميعرف ليش مهمات او بس سامع بيهن.
ضروري التركيز بكل جملة او موقف لان مربوطات سوه وينطيك افضلية اذا كدرت تكسب اكثر قدر ممكن من هاي المهارات سوه.
نبذة عن الاثنين بإختصار:
سوفت سكلز : هيه المهارات الي مثل Office, Computer, coding, languages, و الخ من المهارات الي ممكن ندخل دوره بيهن وطبيعي جداً ناخذ اعلى الدرجات من نكمل الدورة. وهذني المهارات مالهن نهاية شكد ما هوايه ومن الجيد يكون الشخص عنده هيج مهارات
و لكن الانترپيرسونال سلكز : الي هنه القيادة، التواصل، التأثير، الخطاب، الفراسة، سرعة البديهه وردات الفعل وهم اكو هوايه منهن بس خلونه نركز على اهمهم. هذني كللللش مهمات.
سؤال: ليش الانترپيرسونال سكلز اكثر اهمية من السوفت سكلز؟
الجواب: ببساطة جداً، اليوم كلش عادي نلگه شخص متمكن ك سوفت سكلز ونشوفه قوي بالجانب الفني ك حاسبة او مايكروسوفت اوفس و لغة و الخ.. ولكن صعب ينجح بمقابلة او ينال رضا لجنة التوظيف لان المهارات الانترپيرسونال مو مضبوطه.
ناخذ مثال بسيط: الجسم نلعبله رياضه حتى (نمرنه و يقوه) خطين جوه نمرنه ويقوه، كذلك (الدماغ) يحتاج تمرين حتى يقوه. هاي المهارات الي نحجي عنها ك تواصل وتأثير و قيادة والخ. تقوه كل ما يقوه الدماغ بحيث توصل مرحله تكون مهاراتك الشخصية كلش قويه بحيث تكدر تأثر على الناس بشكل عام او (لجنة التوظيف) يعني من تطب مقابلة وعندك مهارة التأثير رح تعرف شلون تتسلل لدماغ اللجنه وتأثر بيهم بحيث ياخذوك ومثل ما ذكرت بالبوستات القبلها (لازم نعرف شلون نسوّق نفسنه) حتى نحصل فرصة (بالعراقي نگول عليه ابو لسان و مينگدرله). واني متأكد مرات من ننسأل اسئله قويه او استفزازيه بالمقابلة مو كلنه نكدر نجاوب ونرتبك واكو بينه حتى يتعرق، والسبب انه هاي المهارات مو قويه عنده بحيث يكدر يرد الجواب بجواب اقوه (مثل مصار ويايه بالبوست القبله ويه مديرتي الاجنبيه).
اكو مقولة لكاتب نسيت اسمه يمكن مصطفى محمود هيج شي يكول؛ اذا رميت يهودي ومسلم بنص بحر، رح ينجو الي يعرف يسبح!!! اي بمعنى ماكو فرق بين هذا وهذاك وانما المتعلم هو الي يغتنم الفرصه ويطلع ف ممكن تطب تتنافس انت وشخص ع منصب بس هو كدر يبرز مهاراته السوفت عن طريق الانترپيرسونال ويأثر عليهم مع العلم انت اقوه منه!!!!
و اكو كتاب اسمه (سايكولوجية الجماهير) كلش انصح بقراءته، يعلم شلون تكدر تكون مؤثر بمجتمع ويكون عندك اتباع ومساندين بحيث تقودهم.
لذلك هذني المهارات هنه الاساس لأي شخصية تبحث عن فرصة عمل جيده لان من تكون بمنصب مدير او قائد فريق مستحيل تنجح وانت ماعندك مهارة التأثير والقيادة الي نحجي عنها. لازم نفكر بيهم قبل لنسولف بإي منصب وراتب وفرصة عمل.
و عندي قاعدة بالحياة (المهارات هيه الي تجيب الفلوس مو الفلوس تجيب المهارات)، واقصد بيها مهارات الانترپيرسونال لان اني مصعدت مدير لوما اثبتت لكل الي جانوا مسؤولين عني رغم صغر سني انه قادر على ان ادير فريق و أثر بمدراء آخرين بداخل مكان العمل. لذلك جنت امثل قسمي بكل اجتماع رسمي واني اتخذ قرار و اختار الي يناسب فريقي بدون محد يتدخل.
الخلاصة: لكل شخص ديلاقي صعوبه منين يبدي وشلون يطور نفسه او يصقل مهاراته وينمي مهاراته، خل يبدي بالانترپيرسونال سكلز او المهارات الشخصية. من تقويهن رح تشوف نفسك تكدر تتناقش ويه فلاسفة وتقنع اكبر شخص بكلامك.
و اكو مقولة لشخص من البارزين بالحياة يمكن ستيف جوبز، يكول من توصل قناعة انه عقل العباقره والعلماء والناس الناجحين المؤثرين بالعالم هسه همه نفس عقلك، رح تكدر تغير مثل ما غيروا.
و الي يسأل شلون اطورهن و شلون اعرف اني شنو احتاج، اگله كلما تحوي اكثر عدد من هاي المهارات كلما تكون اقوه و اقوه،
شلون تطورهن، اكو كلش هوايه طرق، منها الاونلاين تحبث عن كيفية تطوير الانترپيرسونال سكلز (المهارات الشخصية) منها الكتب، والاسهل تسولف وتستشير شخص متمكن بيهن رح يزرع بعقلك شغلات ما ممكن تنساها.
الكتب المقترحة: ريچارد تمبلر قواعد الادارة و سايكولوجية الجماهير
ان شاء الله يكون الموضوع ممتع و مو ملل وبيه فائدة
تعليقات
إرسال تعليق