احكام النون الساكنه و التنوين سادس اعدادي بعشر دقائق فقط راح تفهمها

سلامٌ على العيون الذابلة من كِثرة الدراسة ، وعلى القلب الملهوف للنجاح والتفوّق.💙

طبعا بالنسبة للأحكام جدًا سهلات بس المشكلة انّ بعض الأساتذة مديوصلوها الكم بالطريقة الصحيحة ، هسه راح أشرحها الكم وحتشوفون شگد سهلة وبسيطة وشگد حرامات الدرجات اللي ضاعت علينا بسببهن..

آني بالنسبة الي أشوف من حُسن حظ طلّاب السادس ان احكامهم فقط النون الساكنة والتنوين وأعتبرهن مُساعدة كبيرة الهم💙

عدنا أحكام النون الساكنة والتنوين .. آني ماراح اردلك تعريف واكلك لازم تحفظه ، لان هو السؤال يجي استخرج احكام النون الساكنة او التنوين وبيّن السبب ..ف نشتغل فقط ع حل هذا السؤال ...

اول شي أريدك تنتبه اله انّ النون ساكنة .. يعني مو يجيبولك ( إنَّ مع العُسرِ يُسرا ) گبل تروح ع النون تستخرجها !! هاي النون مُشددة مو ساكنة ويجوز يجيبولك هيج لوفة حتى يدوخوك ف هذا الشي انتبه اله كلّش وشوف حركة النون يلا تبدي

بقواعد اللُغة العربية عدنا علامة السكون هي ( ْ )

بس بالقُرآن ماراح تلكه هاي العلامة أبد لان علامة السكون بالقُرآن أن الحرف يبقى فارغ بدون أي حركة .. واذا رادت تجي حركة إله ف حتكون مثل الدال بس صغيرة او مثل الحاء الاوّلية ع شكل صغير وهسه حراويكم ..

هاي اول نقطة تنتبه عليها..

عدنا أربع أحكام ( الإظهار ، الإخفاء ، الإدغام ، الإقلاب)

نجي للإدغام

عدنه إدغام بغُنّة وعدنا إدغام بدون غُنّة .. شنو يعني غُنّة ؟الغُنّة هي صوت يخرج من الأنف ..

زين شلون نعرف هذا الإدغام بغُنّة أو بدون غُنّة وآني ماحافظ حروف الإدغام او نسيتهن وهيج كلش طارن من بالي؟ 

حعلمك طريقة تعرف بيها الإدغام بغنة او بدون غنة بدون متحفظ أي حرف...

إذا تروح تفتح القُرآن هسه وتباوع للآيات حتلكه تنوين الفتح او الكَسر او الضم.. خلي ناخذ الفتح نشرح عليه

مرة تلكه الفتحات متقاربات كلّش من بعضهن  بالكلمة ومرّة تلكه فتحة بعيدة فتحة .. روح افتح صفحة ٤ بكتاب الإسلامية وشوف مثال(إِنَّ اللَّهَ كَانَ عَلِيمًا حَكِيمًا )  شوف الفتحات مال تنوين الفتح شكد متقاربات... وشوف المثال اللي جواه (لِكُلِّ أَجَلِ ِ كِتَابٌ) شوف بالكتاب الفتحات شلون متباعدات وحدة مو يم وحدة ... 

اذا الفتحات اجن كلش متقاربات ف انت ومغمض تكتب ادغام بدون غُنّة

اما اذا الفتحات اجن وحدة جوة وحدة ف هم انت ومغمض تكتب ادغام بغنة .. طبعا هن ذني الآيات حكمهن مو ادغام بس ردت اوضحلك التنوين شلون من تكون الفتحات متقاربة او متباعدة

هاي أفضل طريقة تكدر تعرف بيها الادغام وتجربها ع الاية اللي تجيك.. واذا كلش صعبة عليك  ومافهمتها ف تكدر تمشي ع طريقة الكتاب اللي هي ..تحفظ حروف الادغام (يرملون )

عندك حرف اللام والراء اذا اجن ورا الميم الساكنة او النون الساكنة ف تكتب ادغام بدون غنّة

اما اذا اجن ( الياء والميم والنون والواو ) تكتب إدغام بغنّة ...

يعني من تشوف النون او التنوين كبل تروح للحرف اللي وراها وتشوفه اذا جان حرف لام او راء تكتب ادغام بدون غنة اما اذا اجن الحروف الباقية تكتب ادغام بغنّة ..

أمّا الإقلاب ف هو أسهل مايكون

هم تروح كبل للنون او التنوين ..

تلفظ الكلمة اذا انلفظت عندك حرف ميم ف هاي كبل إقلاب .. مثلا 

سنبلة .. انت تكتبها سنبلة بس تلفظها سمبلة 

ومادام كتابة الآيات حتجي قرآنية ف بالقُرآن ينكتب ع الإقلاب حرف ميم آخرية ( م ) ف هاي كبل إقلاب ...اما اذا ماميّزت اللفظ ف هم تباوع للحرف اللي بعد النون او التنوين اذا جان حرف باء ف هذا كبل إقلاب

بس انت الفظها افضل وكبل حتعرفها

مثلا هسه كول عنبة

شوف لفظتها عمبة😁

هنا اجه حرف الباء بعد النون ف صارت إقلاب💙

نجي للإظهار

الإظهار شوكت نستخرجه ؟ نستخرجه من نشوف نون عليها مثل الدال صغيرة او حرف الحاء الاوّلي بشكل صغير .. ومن نشوف تنوين فتحاته متقاربات كلش مثل التنوين اللي بالادغام بدون غنّة ...بالنسبة للنون من تشوف عليها هاي الدال الصغيرة كبل انت ومغمض تستخرجها إظهار يبقالك التنوين شلون تعرف هذا تنوين بدون غنّة لو إظهار ؟  انت مادام تعرف ان التنوين اذا اجه بعده حرف لام لو حرف راء تنوين بدون غنّة ف اكيد الحروف الباقية حتبقى إظهار .. 

واذا انت حافظ احرف الاظهار ( أ ، ه ، ع ، ح ، غ ، خ ) او عبارة أخي هاك علما حازه غير خاسر  ف بعد افضل اكيد .. كبل تروح ع النون او التنوين وتشوف الحرف اللي بعدهن اذا احد ذني الحروف تكتبه اظهار واذا ماعرفته او نسيت حروف الاظهار احفظلي بس اللام والراء واستخدم الطريقة الكتلك عليها.🌷💚